الوطن
الشاعرة إيمان أحمد يوسف
عضو أتحاد كتاب مصر
الوطن
ضمة الحضن الأمين
لمة العيلة ف سلام
كلمة الصدق
ف صدورنا بتستكين
يبقى الأمل بين الكلام
هو الضمير هو الوطن
الوطن
هو القمر
ضيه بيفرد ف القلوب
حب الزمن
صدق المشاعر والوضوح
يمسح ظلام كل المحن
الوطن
ندهة الحب الجميل
شمس طارحة بالدفا
قلة تروى ف الحياة
إيد تشد الأيد وتبنى
زرع فارد خير بيجنى
نور كفاح الشقيانين
الوطن
هو السنين
تغزل خيوطها بهمتك
تبقى ابتسامات الساعات
جوة القلوب الطيبة
الوطن
قلب الحبيب
شوق اللقا
إخلاص بيداري
ف شموس الملتقى
يحفظ وعود
أحساس نبيل
جوة مشاعر آمنه
بين الصدور المؤمنة
إن السلام حق الجميع
الوطن
هو شاطئ الحياة
وياشروق الحب
بيقابل مداه
ستر وغطا
ويا وضوح الاتجاه
النور ف قلبك
والطهر منك
والشر جنبك
اوعى تجرى تضيع معاه
الوطن
ندهه ضمير الخير ف دمك
زرع أخضر يرم عضمك
شجرة طارحة ثمر عفى
مطرة بتسقى ف الزمن
معنى الحنان
الوطن
جوة حلاوة الروح عسل
زهر الوجود بين الغيطان
لملم ف محبه كل عام
اسقى بحنانك دنيتك
يبقى الوطن ده جنتك
وابدأ بنفسك أولا
أبدر بذور الخير
حتجنى زرعتك
الوطن
إنسان عفى
مايخافش إلا م الإله
يفرد ضلوعه ف الحياة
ويرعى الضمير
يفرش نجاحه بالكفاح
حا يحس إنه فعلاً جدير
يعيش الحياة
ويلقى الوطن
الوطن
ده مش مخدة أو مكان
الوطن هو البشر
والبشر بيها الحياة
طوق النجاة جوة بحور
ليل الزمن
واقع ساعات لا يؤتمن
جواه طيور تربح
قلوب المؤتمن
سكين وحاير بين العدا
نفوس ضعيفة مغرضة
غاوية تكسر ف الأمان
تمحى سماحة البشر
وتكفن الفرس الشجاع
وتحسسه بمعنى الضياع
ده مش وطن
الوطن
ريحه عطور وسط السطور
ويا الكتابة الساحرة
حزمة حروف
بيها تطوف بين الكيان
تمزج خيال فكر المعانى
شهد الساعات
بين القصيدة والأمانى
والقراءة همه زمانى
اقرأ ح تعرف الوطن
الوطن أم بتدى من قلبها
عيونها فرحة ابنها
أو بنتها
حنانها دافى فى حضنها
بين صدرها كل الهنا
ويوم المنى
لما بيكبر ابنها أو بنتها
ويكون لها سند الزمن
وحصن الوطن
الوطن
إنسان أصيل
يخلع قلوع المستحيل
ويعيش نقى
وسط المبادئ والقيم
يبقى همام
هو رسول الحق
ويا العدل ويا الالتزام
زى ماقالوا الأنبياء
والمرسلين الأوفياء
يبقى الوطن
يبقى الوطن
Categories: أدب ونقد